دریا ائله دیم

ترکی بیر چشمه ایسه. من اونی دریا ائله دیم

بیر سویرق معرکه نی محشر کبرا ائله دیم.

بیر ایشیلتیدی سها اولدوزی تک گورسنمز.

گوز یاشیملا من اونی عقد ثریا ائله دیم

امیدیم وار کی بو دریا هله اقیانوس اولا

اونا ضامن بو زمینه که مهیا ائله دیم.

عرفانا چاتماسا شعر وادب ابقا اولماز

من ده عرفانا چاتیب. شعریمی ابقا ائله دیم.

ابدیتله یاناشدیم دوغولا حافظه تای.

شیرازین شاهچراغین تبریزه اهدا ائله دیم.

ترکی نین جانینی آلمیشدی حیا سیز طاغوت

من حیات آلدیم ا ونا.حق ایچون احیا ائله دیم.

فیض روح القدس اولدی مددیم حافظ تک

من ده حافظ کیمی اعجاز مسیحا ائله دیم.

قمه قداره لر آغزیندا دیل اولمیشدی سوگوش

من سه ئینج ائتدیم اونی. خنجری خرما ائله دیم.

ایندی گویلرده گوزه ل صفله صفا ایله گزیر

منجلابلاردا اوزن اردکی دورنا ائله دیم.

باخ کی حیدربابا ا فسانه تک اولموش بیر قاف.

من کیچک بیر داغی سر منزل عنقا ائله دیم.

بوردا روشن ضمیرین ده هنرین ائله ییم

من اونو ندا قلمین طوطی گویا ائله دیم.

نه تک ایراندا منیم ولوله سالمیش قلمیم

باخ که ترکیه ده.قافقازدانه غوغا ائله دیم.

باخ که تهراندا نه فرزانه لر اولموش واله

باخ که تبریزده نه شاعر لری شیدا ائله دیم.

هم سهندیه سهندین داغین ا ئتدی باش اوجا

هم من اوز قارداشیمین حقینی ایفا ائله دیم.

آجی دیللرده شیرین ترکی اولوردی حنظل

من شیرین دیللره قاتدیم اونی حلوا ائله دیم.

هر نه قالمیشدی کئچنلردن اونا بال پتکی

اریدیب موملو بالین شهد مصفا ائله دیم

ترکی.واللاه. آنالار اوخشاقی. لایلای دیلی دیر

دردیمیمن بو دوا ایله مداوا ائله دیم.

شهریار. حیف ساویخدیر بو  دگیرمان هله ده

دارتماغا یوخدی دنی.من ده مدارا ائله دیم.

استاد شهریار.